არსებობს მოსაზრება, რომ მეძუძურმა დედამ ჩაი შედედებული რძით და შაქრით უნდა დალიოს. ხშირად დედებს არწმუნებენ, რომ ასეთი ჩაის დიდი რაოდენობით მიღება რძის რაოდენობას ზრდის. ეს ქმედება არამარტო არასწორი, არამედ საზიანოც კია.
იშვიათად, მაგრამ გვხვდებიან ბავშვები, რომლებსაც ლაქტოზის აუტანლობა აწუხებთ. თუ არ იცით და ასეთი ჩაის სმას გააგრძელებთ, შეიძლება ბავშვის მდგომარეობა უნებლიედ დაამძიმოთ, ან ძუძუთი კვების შეწყვეტა მოგიწიოთ. მეორეს მხრივ, დედა იღებს შაქრის ზედმეტ რაოდენობას, კალორიებს. ეს არც ჯანმრთელობისთვისაა კარგი და წონის დაკლებასაც უნდა დაემშვიდობოთ.
მეძუძურ დედებს წყურვილის გრძნობა უათმაგდებათ. უმეტესად ზუსტად ძუძუთი კვების დროს იზრდება წყლის მოთხოვნილება. ამ დროს შეიძლება წყალი, წყალში გაზავებული წვენი, ბალახების ჩაი ან კომპოტი მიიღოთ.
ყავის რაოდენობა ორ ჭიქამდე უნდა შეამციროთ, რადგან რძეში მოხვედრილი კოფეინი შესაძლოა, ბავშვის უძილობის მიზეზი გახდეს.
ალბათ ყველამ იცის, რომ მეძუძური დედა აუცილებლად უნდა მოერიდოს ალკოჰოლის მიღებას. ალკოჰოლი რძეში გადადის და ნებისმიერი რაოდენობის შემთხვევაში სახიფათოა. თუ გაქვთ შემთხვევა, როცა ალკოჰოლის მიღება აუცილებლად მოგიწევთ, შეგიძლიათ გამოწველილი რძე შეინახოთ და ერთი კვება ასე აჭამოთ. თუმცა ექიმები გვირჩევენ, სპირტიანი სასმელები ლაქტაციის დროს საერთოდ ამოვიღოთ მოხმარებიდან.
მოამზადა მარიამ სოხაძემ
